Jab Tumhari Yaad ati hai...

Aankhon mein meri hai ek anjani si nami,

Ye dil mehsoos kar rahi hai na jane kiski kami!

Sab kucch toh hai mutthi mein meri,

Phir kya hai yeh ajeeb si besabri?

Saansein toh chal rahin hai, par kya jee rahein hain hum?

Palkein geeli hain, samajh na aye, kaun hai wo ajnabi sanam!

Sapne chod gaya jisne in aankhon mein hazaar,

Kar rahi hun jiska dil thaamkar intezaar,

Jiski aahat ko sun ye dhadkan hai badhti,

Jiske seene ki mehek se ye kajal hai chamakti;

Jiska pyaar hai mera sadaa ka aasra-

Shayad tum hi ho mere jeevan ka wo khush-haal naya savera!!

Ehsaas...

Goonj rahi hai kanon mein madhur say eh jo dhun,
Sun re sathi, tu bhi isey sun!
Shayad hai yeh meri ma ki choodiyon ki khanak,
Shaya hai yeh meri behen ke payal ki chanak!
Sun re sathi, tub hi isey sun!!

Dikh rahe hai haseen say eh jo mujhe sapne,
Bol mitr, kya ishara de rahe hain mujhe mere apne?
Rache hain ye khwab, mere taat ke seene ki dridhta se,
Range hain yeh swapn, mere bhai ki lahu ki lalima se!
Bol mitr, kya ishara de rahe hain mujhe mere apne?

Varsha ka yeh meetha jal, bujhaye jo mera pyaas,
Aa bandhu, tub hi soongh in phoolon ka suvaas!
Ghula hai isme mere guru ke gyaan ka ujala,
Laye yeh door se, mere mahi ke prem ka sandesa
Aa bandhu, tub hi soongh in phoolon ka suvaas!!

Tumharey Intezar Mein

Tumharey intezar mein khadi hun, jeevan-raah ki iss mod par-
Tumharey intezar mein jag sara machal utha, jhoomkar!

Tumharey intezar mein akash ye vistrit, laga sikudne-
Tumharey intezar mein zameen ye lagi paniyon mein ghulne!
Tumharey intezar mein chand-suraj milkar ho gay ek-
Tumharey intezar mein aag ne bhi khoye apna sara tez!

Tumharey intezar mein nadiyan ye ruki, sagar se milne ab vo daudti nahi-
Tumharey intezar mein panchiyan pukar rahi, door van mein kahin!

Tumharey intezar mein indradhanush ke sarey rang chamk uthey-
Tumharey intezar mein hawayein sari dishaon ki, lagi thamney!

Tumharey intezar mein badalon ko chirkar choom rahi hai mujhe ye suryakiran-
Tumharey intezar mein prakriti khud bani meri abahran!

Tumharey intezar mein main sun rahi hun madhur si ek sargam-
Mitr, tum na aye, toh ajivan yuhi rahengi meri aankhen nam!

Kash...

Kash ki tumne meri tanhayi ko yunhi rehne diya hota-
Kash ki tumne is registan mein baarish ki ummeed na dikhayi hoti!
Kash ki tumne is toote dil ko fir se joda na hota
Kash ki tumne in ghavon par marham lagaya na hota-


Kash ki tumne mujhe khushi ka raasta na dikhaya hota-
Kash ki tumne mere kam ko laghav na kiya hota!
Gam mere katey, dobara dukhane ke liye-
Khushiyan mujhe mili, dobara khoney ke liye!


Ghav mere bharey, is baar aur dardnak chot lagne ke liye-
Toota dil mere juda, is baar choor-choor hone ke liye!
Marubhumi mein badal umdey, sirf udd janey ke liye-
Tanhayi kati, mujhe aur akela chodna ke liye!


Khoi khushiyan wapas dhoondhne ki ab mujhme kshamta nahi-
Is peeda ko sehne ki ab mujhme takat nahi!
Kash ki uss ghani raat ke baad suraj dobara nikalta hi nahi-
Kash ki tum kabhi mere jeevan ka ang bantey hi nahi!!

Vaada.... ek pyaar karne waley ka

Kuch log vaada kartey hain- tumhare liye jaan tak de dene ka
Hum vaada kartey hain- atma tak ki ahuti tumhare liye dene ka...


Kuch log vaada kartey hain- apni har khushi tumhare sath baantney ka
Hum vaada kartey hain- apni har khushi tumhe arpan karney ka...


Kuch log vaada kartey hain- tumhare rang mein rang janey ka
Hum vaada kartey hain- tumhare liye jeevan ko apni berang tak karney ka...


Kuch log vaada kartey hain- har dukh me saath tumahara nibhane ka
Hum vaada kartey hain- Har dukh tumhara apnane ka...


Kuch log vaada kartey hain- tumhare liye kuch bhi karney ka
Hum vaada kartey hain- tumhare liye kuch bhi sehne ka...


Kuch log vaada kartey hain- sitarey tak tumharey liye tod laney ka
Hum vaada kartey hain- dhruvtarey ki roshni jaise tumhe pyaar me apne ghirey rakhne ka...


Kuch log vaada kartey hain- saaton janam tumhara sath dene ka,
Hum vaada kartey hain- kayamat tak sang tumhare chalne ka....